ਰਾਜਪੁਰਾ,14 ਅਗਸਤ(ਹਿਮਾਂਸ਼ੂ ਹੈਰੀ):ਸਥਾਨਕ ਪਟੇਲ ਕਾਲਜ ਦੇ ਪ੍ਰਿੰਸੀਪਲ ਡਾ. ਚੰਦਰ ਪ੍ਰਕਾਸ਼ ਗਾਂਧੀ ਦੀ ਅਗਵਾਈ ਹੇਠ, ਪਟੇਲ ਮੈਮੋਰੀਅਲ ਨੈਸ਼ਨਲ ਕਾਲਜ, ਰਾਜਪੁਰਾ ਦੇ ਮੈਨੇਜਮੈਂਟ ਵਿਭਾਗ ਨੇ “ਤਿੰਨ ਰੰਗ, ਅਣਗਿਣਤ ਪ੍ਰਗਟਾਵਾ” ਦੇ ਦ੍ਰਿਸ਼ਟੀਕੋਣ ਨਾਲ ਵਿਦਿਆਰਥੀਆਂ ਵਿੱਚ ਦੇਸ਼ ਭਗਤੀ ਪੈਦਾ ਕਰਨ ਅਤੇ ਰਚਨਾਤਮਕਤਾ ਨੂੰ ਉਤਸ਼ਾਹਿਤ ਕਰਨ ਲਈ ਝੰਡਾ ਬਣਾਉਣ ਦੇ ਮੁਕਾਬਲੇ ਰਾਹੀਂ ਆਜ਼ਾਦੀ ਦਿਵਸ ਮਨਾਇਆ। ਇਸ ਸਮਾਗਮ ਦੇ ਕਨਵੀਨਰ ਡਾ.ਕੁਲਵਿੰਦਰ ਕੌਰ, ਮੁਖੀ ਮੈਨੇਜਮੈਂਟ ਵਿਭਾਗ ਸਨ ਅਤੇ ਸਹਿ-ਕਨਵੀਨਰ ਪ੍ਰੋ.ਮਮਤਾ ਸ਼ਰਮਾ ਅਤੇ ਡਾ.ਅਮਿਤਾ ਕੌਸ਼ਲ ਸਨ। ਝੰਡਾ ਬਣਾਉਣ ਦੇ ਮੁਕਾਬਲੇ ਦਾ ਵਿਸ਼ਾ ਸੀ-ਹੱਥਾਂ ਤੋਂ ਦਿਲ ਤੱਕ -“ਤਿਰੰਗਾ”। ਸਮਾਗਮ ਦੇ ਜੱਜਾਂ-ਡਾ. ਜੈਦੀਪ ਸਿੰਘ,ਡਾ.ਸ਼ੇਰ ਸਿੰਘ ਅਤੇ ਡਾ.ਦਲਵੀਰ ਕੌਰ ਨੇ ਬੀਬੀਏ-3 ਤੋਂ ਹਰਮਨਪ੍ਰੀਤ ਅਤੇ ਪਰਬਜੋਤ ਨੂੰ ਜੇਤੂ ਐਲਾਨਿਆ। ਦੂਜਾ ਸਥਾਨ ਬੀਕਾਮ 1 ਤੋਂ ਹਰਸ਼ਿਤਾ ਅਤੇ ਦੀਕਸ਼ਾ ਨੇ ਅਤੇ ਤੀਜਾ ਸਥਾਨ ਬੀਬੀਏ 1 ਤੋਂ ਹਰਸ਼ਪ੍ਰੀਤ ਅਤੇ ਜਸ਼ਨਪ੍ਰੀਤ ਨੇ ਪ੍ਰਾਪਤ ਕੀਤਾ। ਬੀਬੀਏ 1 ਤੋਂ ਮਨਪ੍ਰੀਤ ਅਤੇ ਪ੍ਰਿਯੰਕਾ ਨੂੰ ਹੌਂਸਲਾ ਅਫ਼ਜਾਈ ਸਰਟੀਫਿਕੇਟ ਦਿੱਤੇ ਗਏ ਸਾਰੇ ਜੇਤੂ ਉਮੀਦਵਾਰਾਂ ਨੂੰ ਇਨਾਮ ਅਤੇ ਸਰਟੀਫਿਕੇਟ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਡਾ. ਗਾਂਧੀ ਨੇ ਵਿਦਿਆਰਥੀਆਂ ਨੂੰ ਸੰਬੋਧਨ ਕੀਤਾ ਅਤੇ ਉਨ੍ਹਾਂ ਨੂੰ ਜ਼ਿੰਮੇਵਾਰ ਨਾਗਰਿਕ ਬਣਨ ਅਤੇ ਆਜ਼ਾਦੀ ਲਈ ਸ਼ੁਕਰਗੁਜ਼ਾਰ ਹੋਣ ਲਈ ਪ੍ਰੇਰਿਤ ਕੀਤਾ। ਉਨ੍ਹਾਂ ਵਿਭਾਗ ਦੇ ਮੈਂਬਰਾਂ ਨੂੰ ਵੀ ਵਧਾਈ ਦਿੱਤੀ ਅਤੇ ਵਿਦਿਆਰਥੀਆਂ ਲਈ ਅਜਿਹੀਆਂ ਹੋਰ ਗਤੀਵਿਧੀਆਂ ਦਾ ਆਯੋਜਨ ਕਰਨ ਲਈ ਕਿਹਾ।